संविधानको सफल कार्यान्वयन मात्र पंगेनीप्रति सच्चा श्रद्धाञ्जली

गते प्रकाशित

काठमाडौँ, ३ असोज । संविधानको सफल कार्यान्वयन भएमा मात्र स्वर्गीय कमल प्रसाद पंगेनी प्रति सच्चा श्रद्धाञ्जली हुने काँग्रेस नेताहरुले जनाएका छन् ।

नेपाली काँग्रेस स्याङ्जाका पार्टी सभापति एवं संविधानसभा सदस्य स्व पंगेनीको ४५ औँ पुण्यतिथिका अवसरमा काङ्ग्रेस स्याङ्जा–काठमाडौँ सम्पर्क समितिले आज राजधानीमा आयोजित काँग्रेसका नेताहरुले संविधान निर्माणमा पनि पंगेनीको ठूलो योगदान र पसिना बगेको भन्दै यस्तो बताएका हुन् । कार्यक्रममा काँग्रेस महामन्त्री डा शशांक कोइरालाले स्व पंगेनीले काँग्रेस स्याङ्जाको सङ्गठनलाई विस्तार गर्न महत्वपूर्ण भूमिका खेलेको बताउँदै पंगेनीको अभावमा पनि स्याङ्जा काँग्रेस पङ्गेनीले चाहेजस्तै हुनुपर्नेमा जोड दिए ।

पंगेनी बिकासप्रेमी नेता भएको बताउँदै महामन्त्री कोइरालाले उहाँ आफ्नो क्षेत्रका लागि मात्र नभई सबै क्षेत्र र स्थानीयका लागि उत्तिकै काममा मन्त्रालय धाउने गरेको उल्लेख गरे । “बिपी कोइरालाले भनेजस्तै काङ्ग्रेस हेर्न स्याङ्जा जानुहोस् भन्ने सङ्गठन निर्माण गर्न तपाईंहरु लाग्नुहोस”, महामन्त्री कोइरालाले थपे । काँग्रेस नेता प्रकाशमान सिंहले पार्टी रुपान्तरणका लागि अहोरात्र खट्ने नेता स्व पंगेनीको निधनले आफू निकै भावुक र स्तब्ध भएको भन्दै उहाँ जनताप्रेमी नेता भएको भन्दै प्रशंसा गरे ।

अर्का नेता गोपालमान श्रेष्ठले बिपी कोइरालाको संविधानसभाबाट संविधान निर्माण गर्ने सपना पुरा भएको र बताउँदै संविधान कार्यान्वयन भए पंगेनीको सपना पूरा हुने बताए । श्रेष्ठले भने “पङ्गेनीको नाममा स्याङ्जामा हृदयरोग केन्द्र स्थापना गर्नुपर्छ, जहाँ बेलाबेलामा मुटुको चेकजाच गर्न सकियोस् जसका कारण यस्तो अप्रत्यासित निधनलाई रोक्न सकियोस ।’’ आफू पंगेनीको सहयात्री भएकोले पंगेनीको सपना साकार पार्न सदैव लाग्ने प्रतिवद्धता पनि जनाए । काँग्रेस नेता कृष्णप्रसाद सिटौलाले स्याङ्जा काँग्रेसको सङ्गठन बलियो भए मात्र पङ्गेनीप्रति सच्चा श्रद्धाञ्जलि हुने बताए । 

कार्यक्रममा काङ्ग्रेस नेता धनराज गुरुङ, गगन थापा, प्रदीप पौडेल, संविधान सभा सदस्य तथा पूर्वसांसद राजु थापा, मोहन पाण्डे, सम्पर्क समितिका सभापति देवीप्रसाद अर्याल, काँग्रेस स्याङ्जाका सचिव कुमार राना, नेबिसंघ स्याङ्जा काठमाडौं सम्पर्क समितिका अध्यक्ष दिपेन्द्र क्षेत्री लगायतले पंगेनीको निधनप्रति गहिरो दुख व्यक्त गर्दै स्याङ्जामा रहेको गुट उपगुटको अन्त्य गर्न सबै लाग्नुपर्नेमा जोड दिए ।

कार्यक्रममा पंगेनीको सम्झनामा स्थापना गरिएको ‘स्वर्गीय कमल पंगेनी स्मृती प्रतिष्ठानमा’ पूर्व सांसद राजु थापा र मोहन पाण्डेले १ लाख ५१ हजार, ने.का. सम्पर्क समितिले १ लाख सहित अन्य विभिन्न व्यक्तिहरुले पनि सहयोग घोषणा गरेका थिए ।

दोस्रो संविधानसभाको निर्वाचनमा संविधान सभा सदस्यमा निर्वाचित र २ कार्यकाल जिल्ला सभापति भईसकेका पंगेनीको साउन २० गते स्याङ्जामा हृदयघातका कारण निधन भएको थियो ।

कमेन्ट गर्नुहोस्

तपाईं हामीसंग फेसबुक,र ट्वीटर मार्फत् पनि जोडिन सक्नुहुन्छ ।