रियो ओलम्पिकमा पहिलो पदक जितेपछि कन्डक्टरकी छोरी रातारात करोडपति

नयाँ दिल्ली, २ भदौ – रियो ओलम्पिकमा भारतलाई पहिलो पदक दिलाउने साक्षी मलिक रातारात करोडपति बन्न पुगेकी छिन्। साक्षीले बुधबार राती भारतलाई महिला कुस्तीमा कास्य दिलाएकी थिइन्।

उनले रियोमा भारतलाई पहिलो पदक दिलाएपछि हरियाणा सरकारले २ करोड ५० लाख भारतीय रुपैयाँ दिने घोषणा गरेको छ। २३ वर्षीया साक्षीले ५८ केजी मुनिको स्पर्धामा रेपचेजको आधारमा भएको खेलमा किर्गिस्तानकी एसनु तिनिभेकोभालाई ८-५ अंकले हराएकी थिइन्। उनी ओलम्पिकमा पदक जित्ने पहिलो भारतीय कुस्तीबाज पनि हुन्।

उनलाई पुरस्कार रकमबाहेक हरियाणा सरकारले घर बनाउन जग्गा र जागिर पनि दिने घोषणा गरेको छ। भारतले रियोमा १२ दिनको प्रतिक्षापछि पहिलो पदक जितेको थियो। उनलाई भारतीय रेग्वेले पनि ५० लाख भारतीय रुपैयाँ दिनेछ। रेल्वेले पहिलेदेखि नै ओलम्पिकमा स्वर्ण जित्नेलाई १ करोड, रजतलाई ७५ र कास्यलाई ५० लाख रुपैयाँको घोषणा गरिसकेको छ।

यस बाहेक जेएसडब्ल्युले १५ लाख र भारतीय ओलम्पिक कमिटी (आइओसी) ले २० लाख भारतीय रुपैयाँ दिने बताएको छ। भारतीय सिनेमाका स्टार सलमान खानले पनि उनलाई १ लाख रुपैयाँ दिने बताएका छन्। साक्षीका पिता सुखबीर नयाँ दिल्लीस्थित डिटिसीको बसमा कन्डक्टर छन्। सन् २०१२ को लन्डन ओलम्पिकमा भारतीय टोलीमा समावेश भएर पहिलो महिला कुस्तीबाजको पहिचान बनाएकी गीता फौगाटको स्थानमा साक्षीले रियोमा भाग लिने मौका पाएकी हुन्।

रियो ओलम्पिकका लागि मंगोलियामा भएको छनोट खेलमा कास्य स्पर्धाका लागि गीता म्याटमा उत्रिन मानिनन्। उनले रेफ्रीको निर्णयप्रति औला उठाएकी थिइन्। त्यसैले उनलाई ओलम्पिक खेल्न अयोग्य घोषित गरिएको थियो। यही स्पर्धामा गीतासँगै मंगोलिया गएकी साक्षीले ‘वाइल्ड कार्ड’ मार्फत रियो ओलम्पिकमा मौका पाएकी थिइन्।

साक्षी ओलम्पिकमा पदक जित्ने चौथो भारतीय महिला खेलाडी हुन्। यसअघि सन् २००० को सिड्नी ओलम्पिकमा भारत्तोलनमा कर्णम मल्लेश्वरी, २०१२ लन्डन ओलम्पिकमा बक्सर मेरी कोम र ब्याडमिन्टनकी साइना नेहवालले कास्य जितेका थिए।

कास्य जितेपछि साक्षीले भनिन्, जीतप्रति निश्चिन्त थिएँ। यो भारतीय महिला कुस्तीबाजको लागि ऐतिहासिक मौका हो। मेरो १० वर्षको कडा मेहनतको नतिजा हो।’ भारतले लगातार तेस्रो ओलम्पिकमा रेपेचेजको आधारमा मेडल जितेको हो। सन् २००८ बेइजिङ र २०१२ लन्डन ओलम्पिकमा योगेश्वर दत्तले उनीजस्तै रेपचेज राउन्डमा देशलाई कास्य दिलाएका थिए।

कमेन्ट गर्नुहोस्

Leave a Reply

Your email address will not be published. Required fields are marked *